صوته تقشعر منه الأبدان…مسجد نقي…مصلون انقياء…هدوء وسكينة…والمثير رجل يجلب لطفل هدية لتشجيعه على ارتياد المسجد…يحدث هذا في بعض المساجد التي زرتها مؤخرا تقبل الله منا ومنكم صالح الأعمال…وحنا الحبشي ماتايصلي لا هو لا ولادو…وكل جمعة خاص الفقيه يقول للناس عافاكوم عمرو الصف الأول ثم الذي يليه…اغلب المصلين عندنا حنا نهار الجمعة ناعسين ماتايفيقو حتى تايسمعو قد قامت الصلاة قد قامت الصلاة…وعاد تايبقاو درااااااااف دردلااااااااااااف…وغير تايصليو تتسمع ماكاين غير الزحام والجرا نحو الباب تقول مخليين التربية باغيين يرضعوهوم…وشي وحدين تايقربو يديرو ليك صبابطهوم الخانزين على وجهك…وخاصنا كل صيف نقولو للناس عافاكوم جيبو الشرط للفقيه…صافي وصل الصيف حصدتي جمعتي التبن درتي البال درتي الراااااااااطو…قربتي تحرث عاوتاني…دخلتي الكرمومة جيب للسيد رزقو…شي فهايمية قالك ايوا الفقيه تاتخلصو الدولة…ونت شغلك وفين عندك الحريق تخلصوا حتى الأمم المتحدة…تتعطيه شي حاجة من عندك نت ابوقاااااااااال…مالك اش حرق شطاطك…أما دوك السعاية والطلابة الله يحفظ…كلنا كانسعاو الله تعالى…ماكاين غير الزكا والغوات بمجرد مايقول الفقيه السلام عليكم ورحمة الله وبركاته…اللي عطا شي الله المحسنين…هادوك راهوم بوفرية وفقراء الله يتكافاو مع الزمان ونتوما باركين عليهوم اللي عطا شي لله المحسنين…كل جمعة نفس الموال…ونفس الديسك…زعما نتوما هاد السعاية مازال مادرتوش لباس…سنوات ونتوما تاتسعاو مازال ماقنعتوش…سيرو سعاو اخناتوش العظيم مالكوم ماعارفينش فين كاين راه كاين غير فالتلفزة…ههه…بلا مانهضر على هادوك اللي تايجيو معطلين وتايبداو يتخطاو عباد الله تقول داخلين للصالون ديالهوم…جيتو معطلين صليو فاخر المسجد ولا ها العار إلى ما غا كلسو راكوم فتنتو الجامع…وزيد دوك اللي تايشدو الحيط تقول فيهوم السياتيك…بلا ما ننسا دوك اللي نت تتقرب ليهوم رجليك وهوما تايهربو تقول خايفين من الجربة…وعاد صحاب الكراسي…تايقيلو النهار وماطال وهوما تايسيركليو فالدروبة والزناقي وملي تايجيو للجامع تيقلبو على الكراسى بقا غير نجيبو ليهوم التيليكوموند وشي دكيكة مشحرة…اما دوك اللي تايتوضاو فالمراحيض والله ياخويا بعض المرات ماتقدر تدخل لدوك المراحيض من قوة الوسخ اللي فيها…السيد مسكين الله يتقبل منو تايقيل ينظف والو فحال الى تاتخوي الما فالرملة…ولا شي وحدين الى دخلو للمرحاض هاديك هي بلاصتهوم ماتايسخاوش يخرجو مساكن دغيا تايولفو الله يعفو…الولف صعيب والربطة زغبية…ههه…
التعليقات مغلقة.