سروالو…طايح…
محسن على ودنيه…
التلفون مسلفاه ليه ختو…
عندو النوامر ديال كاع البنات…
مكونيكطي بزيرو فسيبوك…
تيمشي للمدرسة معطل…
ديما مدابز مع خوه على السبرديلة…
داير دهنة بيريمي على راسو…
مزير البودي على صدرو…
ضارب اتاي الى لقاه…
تيسبيكي شي كليمات بالفرنسية معوجة…
ديما كالس اللور فالقسم…
صحابو من صحاب السوابق…
كيضل يكدب على البنات…
كيشجع البارصا وكيعرف كاع الفرقة…
الى ملقتيهش فالزنقة تلقاه عاصر فشي بوطو…
ميعرف يكتب…ميعرف يتكلم مكود…ميعرف يحتارم اللي كبر منو…ميعرف يتسخر…المهم لاقراية لازين لامجي بكري…لكن السؤال…الذي يحيرني من ادى بشبابنا الى مثل هذه الاوضاع المزرية والمقرفة والفضيعة…انها الاسرة التي تخلت على واجب التربية واكتفت بتوفير العلف…يعني الخبز والدواز واتاي…الاب يظل النهار ومطال وهو تيتقاتل من اجل ضمان القوت اليومي …مرة يخدم ومرة ميخدمش…والام مسكينة…وخا عيات الا انها لا يهدا لها بال الا اذا دخل بوالركابي من الزنقة…وتسولو واش تعشيتي …وهو وخا تعطيه الكرافيت يسرطو…الاسرة اذن تخلت على التربية …وكذا نفس. الشيئ بالنسبة للمدرسة…التي بنيت حيطانها من اجل استيعاب مثل بوالركابي الذي غالبا مكينقز من السور من بعد مايسد عليه الحارس الباب…المدرسة تكتفي بالتلقين…وبوالركابي مكيقشع والو…حاضي غير البسالة والحموضة فالقسم والتبرزيط…وملي تيطلع للاستاذ فراسو …تيجري عليه…وميدخل حتى يجيب باه…اما الشارع…فذاك مشكل اخر…اصبح في الحقيقة هو المربي…والمكون والمؤطر…الدري تلقاه عارف كاع التحراميات…والمسخوط معارفش حتى فرائض الوضوء…بل متيصليش اصلا…لانه كبر فاسرة متتعرفش كاع القبلة فين جات اصلا…يبقى الزغبي مسنتر فالشارع حتى للنصاصات ديال الليل…وملي يجي للدار يبدا يقرقب فالكوزينة…باغي ياكل …الله يوكل ليك المسامر….هذا الى مجاش للدار سكران ولا مقرقب ولا محشش ولا شي عجب اخر…انا اخوتي معرفتش بالخصوص هادوك اللي تيتقرقبوا وتيبدا يضرب فراسو بزيزوار ولا بموس…زعما تيبغي يبين لعباد الله انه راجل وصعيب…سير الله يقلل حياك اشمن راجل بقات فالموسطاش…هاد الشي بلا منساو دوك المبليين بالنفحة …داير كونطرة مع المشوار..تقول غير ام كلثوم فزمانها…اما التلفزة ووسائل الاعلام فاعتقد هي اللي سالات مع هاد الجينيراسيون ديال تاخير الزمان…الدري تلقاه تيبكي مع مسلسل ديال خلود…وكمال…وشي عجب اخر انا كاع معرفتو…بالاضافة الى الاغاني الساقطة والافلام الهابطة والبرامج التافهة…علاه التلفزة ملي تطرح عليك السؤال مثلا…شنو سميت عمة خلود…بهية ولا زبيدة…ههه…واش ماشي الكلاخ هدا…بالسيف ميخرج بوقال مكلخ…وعارف غير السريط والمريط والمريط وحتى حاجة متشيط…والى سولتيه…شكون هو اول الخلفاء الراشدين يقول ليك عباس بن فرناس…المهزلة…اما القران تلقاه حافظ سورة الفاتحة وغير بالزز…والكارثة ملي يخرج للزنقة…متفرقش بينو وبين البنت…ولا يتزاحم مع ختو على المراية…ابوراس …زكي معانا وترجل معانا غير مرة وحدة فحياتك…راه حنا لاعبين ناقصين…اصلا…وللحديث بقية…تهلاو فراسكوم…تبقاو على خير…
التعليقات مغلقة.