جربوا معايا كلشي …وخسروا فكلشي… هم ضباط ليسوا كالضباط…لايتقاضون أجرا من الدولة… وغير منخرطين في الاسلاك الوظيفية…وليست لهم نياشين ولا رتب… ولا هم يحزنون…هوما عندهوم ثلاثة ديال الحواس اللي خدامة فقط… العينين …الودنين… الفم …الفم ماضي …والدراع كاضي…ليس خريجو مدرسة …ولا مسجد ولا اي شيء…كل يومياتهم ولد عاشورة…فين تيمشي …فين تيدخل…فين تيسافر…منين تتجيه الفلوس…مرة تيقولوا حزب العدالة والتنمية تيخلصني وداير ليا الشهرية…ومرة تيقولوا حركة التوحيد والاصلاح تتعطيني راتب شهري…ومرة تيقولوا منظمة التجديد الطلابي تتخلصني فالشهر…ومرة تيقولوا وزارة الاوقاف دايرة لي صالير…بل كانوا تيقولوا باللي عندي طابع فالظهر تتخلصني عليه الدولة…قمة الجهل والخرافية والخزعبلية المقيتة…ومرة تيقولوا باللي الجمعيات ديال الخارج تتسيفط لي الفلوس من برا….المهم هاد الضباط هوما ولاد عائلة…تيدخلوا بجوج …وتيخرجوا بجوج …وتيسافروا بجوج …وشادين واحد مجموعة ديال ضعيفي الايمان…تيظلوا يتساراو على الناس…باش يجيبو ليهوم الخبيرات السخونة…بلاريال …بلا جوج…هاد الضباط متافقين فكلشي…حتى الى قرروا يباشروا زوجاتهم للاسف الشديد…تيتافقوا بجوج… حكاية هاد الظباط معايا قديمة لكن بايخة… وبايتة… وباسلة… وحامضة…النهار ومطال وهوما تيقلبوا ليا على السبة…شادين فيا بالهضرة …والشفوي… والنميمة… والتبركيك… والحضية والتاشكامت…والى مشاو تلاقاوني تيبداو يبينوا لي دوك السنان الصوفر ديالهوم…المليئة بالدواز والبطاطا القصبية…فحال الى مكاين حتى حاجة…وهوما قلوبهوم عامرة بالحقد والحسد والضغينة والكراهية والشماتة…لا لشيء الا لاني اولا براني …زموري يعني…ماشي ولد البلاد…وافتخر بزموريتي…وكنت داير ليهوم الحلاقم… ومطلع ليهوم السخانة…وشادهوم بوهتهات …واللي دوا يرعف…ثانيا لانني مختلف عنهم ومعاطيهومش وقت… وعمري ما مديت يدي لشي قمقوم… ولا حاشيتها لشي كنطوح…بخير وعلى خير…والاكثر من هذا كنت تنقي ليهوم ودنيهوم مزيان…فالجامع…وخا مكانوش حامليني…ههه…كن لقاو كن طيروني…المهم صبرت وصابرت وكنت كل جمعة في المسجد… تنعطيهوم القرنابي…اتذكر مرة…تكلمت على الزواج وفصلت فيه شيءا ما …ولما خرجوا قال واحد الضابط لصاحبو…ولد عاشورة خرج اليوم للحصيدة…زعما اتذكر كذلك…اني لما كنت ادرس في الجامعة…كنت في اغلب الاحيان اراجع دروسي في الخارج…واحد النهار داز عليا ولقاني تنحفظ…ولما تلاقا الوالد رحمه الله قالوا…واش داك الطيرابكر ديال ولدك مغاديش يتوظف …يخدم زعما…غابقا غير تيقرا…ههه…جاوبو الواليد قالو رحمه الله…هاداك الطيرابكر هو اللي غادي ينقبك شي نهار…وفعلا كنت تنعطيه على ودنو حتى متيقد يزيد…شي نهار تلاقاني وقالي مشيتي عند فلان وقلتي ليه راه فلان مغاديش يصوت عليك في الانتخابات…هداك فلان راه ولد عمتي…ولد عمتو ومصوتش عليه…ونت اش دخلك …راه متيدخل بين اللحم والظفر غير الوسخ…وانا ننزل عليه…قلت ليه مكاينش شي وسخ فالدنيا قدك…ونت كلك وسخ اصلا لكن مشايفش راسك فالمراية… وقالي غاندعيك…قلت ليه فوت الرباط…ومتنساش مجلس الامن… ومحكمة العدل الدولية…حتى هي…من ديك الساعة وهوما مقاطعيني… ومتيصليوش معايا وجراو عليا من الجامع…ودايرين فيها هوما الزعماء ديال القبيلة…وتيفهموا بزااااف…وهوما مفاهمين حتى وزة…اتذكر كذلك نهار دار واحد الاخ السبوع…ووصاني باش منهضرش ولا نتكلم ولا ندير شي موعظة…قلت ليه ماشي مشكل… وبقيت صابر واحد الساعة وانا نقول بسم الله الرحمان الرحيم…وهوما يقفزوا وناضو…وانا عاد قلت ليهوم اللي فيه الفز تيقفز…واصلا اذا حضرت الملائكة تغيب الشياطين… المهم كانوا دايرين حالة فديك البلاد…لكن الله سبحانه وتعالى كيعطي لكل واحد على قد نيتو…فين مايتلاقاوني دابا تيبداو عليا…والله اسي محمد الى راك عزيز علينا …تنقول مع راسي…شوف التنوفيق والتنوعير…ديال هاد الضباط…كيفاش داير…سيرو بغيت غير العز …اما الذل راكوم عايشين فيه… مقال للاعتبار…وليس للاشهار…وكما تدين تدان…والسلام…
التعليقات مغلقة.