الانتفاضة/محمد المتوكل
النهار ومطال وهو ناشر رجليه فالقهوة…وحتى القهوة ممخلصهاش…وتيبقا عاصر على ديك القهوة أ بالسوايع…القهوة الكحلة بالحق…كل مرة تيقول للكارسون عافاك هاك هاد القهوة سخنها ليا…الكارسون من قوة مطلعلو السيد فراسو…ولا غير تيشوفو تيقلب الساعة بأخرى…تيجيب ليه القهوة وتيقول ليه إيوا خلصني بعدا فدوك القهاوي اللي شربتي شحال هادي …تيبقى صاحبنا تيتفتف…ويخرج كلمات غير مفهومة …والمفهوم منها أنه باغي يجغمط الكارسون فرزقو…وزايدون اش تيدير هو هاد خيينا فالقهوة النهار ومطال…إلى كانت الكورة تلقاه هو الأول… تيفهم فالبارصا والريال …والوداد والرجاء… وتيفهم فالخطة والتركيبة البشرية والتكتيك والشرود و الأهداف… وتيعرف حتى الإحتياط ديال الفرقة…وتيولي صاحبنا محلل رياضي كثر من هادوك اللي تيبانو فالجزيرة الرياضية …أو بيين سبورت الآن…مرة تلقاه تيغوت…مرة تلقاه تيضحك…مرة تلقاه تيتأسف…مرة تلقاه تيتوجع…مرة تلقاه تيتخاطر مع صحابو على شكون اللي غادي يربح…مرة تيقول ليهوم …واه أصحابي علاش ميسي مضربهاش فالقنت…زكلها …إيوا نوض نت نيت ضربها أبو ركابي…ميسي تيتخلص بالملايين ديال الأورو …وأنت كالس مقابلو ومعندكش حتى باش تخلص القهوة بخمسة دراهم… وزايدها بفريع المخ…أما إلى كان البرلمان هو اللي خدام فالتلفزة …صاحبنا كيولي بحال فيصل القاسم…كيعرف كل صغيرة وكبيرة فالمجال وهو التعريف ديال البرلمان ميعرفش منين يجي ليه…وهلم جرا…قلنا فالبداية علاش خونا ضارب دوك السوايع كلها فالقهوة…هو مغراضو لا بارصا لا ريال لا سياسة…إنما غراضو يقني على شي وحدين …وراه كيتسنا فصاحبو الآخر… يجي يقضي معاه الوقت فالقنية …وأهم موضوع عندهوم هو يتمشخروا على ظهر شي مخلوق بالهضرة والنابوبي… ويكرضوا عليه النهار مطالعاش مطالعاش…يشدو فعباد الله بلا سبب…هادك دار …هداك مدارش… هداك دخل… هداك خرج… هداك تزوج …هداك طلق… هداك فقير… هدك ملعق …هداك شفار …هداك قمار …هداك نصاب هداك رشايوي… هداك مفسد …هداك فاعل …هداك تارك…يضلو ياكلو فلحم عباد الله …وزيد وزيد وزيد…المهم خونا مغراضو حتى حاجة ومعندو حتى هدف فالحياة ومتتهموا لا مصلحة ولاهم يحزنون…مقابل البحر لا يرحل …عفوا مقابل عباد الله شنو تدير وناسي شغلو …أستغفر الله أشمن شغل عندو …لا شغل لا مشغلة …إلا القنية ويحضيك فالدورة …وإلى تصاب حتى تلاقيتي معاه يضرب واحد مولاتي الضحكة الصفرة…وهو تيتمتم فنفسو متعرفو أش تيقول…ميقول كلام زين… ميهني الوقت…الطالعة ديالو والنازلة ديالو …واللي مشافهاش عندو فيها النص…كلو هضرة اللي متشري خضرة…من بعد القهوة يبقا قاني فالدروبة والزناقي وباقي الأماكن العمومية والخاصة…تيلفونو عامر بالنوامر…وشي نوامر كاع معندو ميدير بيها…ومرة ومرة تيصوني عليك بالبريفي باش يبرزطك…وشي مرة باش يقلقل ليك السوق…المهم هو معندو حتى غرض سوى أنه يقني على عباد الله …ويعرف بنادم علاش ناوي…أسيدي مناوي على والو غير تفرق معايا …ههه…للحديث بقية تبقاو على خير…
التعليقات مغلقة.