تعاني منطقة عين الجمعة ومنذ سنوات خلت من الإقصاء والتهميش والعزلة وعلى كافة المستويات…لا تعليم زين …ولا صحة مقادة… ولا طرقان معبدين… ولا واد حار فحال الناس …ولا ملاعب مصايبة… ولا فضاءات تتحمر الوجه ولا شيء…مما نتج عنه أن تبقى عين الجمعة خارج التاريخ والجغرافيا والتربية الوطنية…لا يمكن أن ينقذها سوى شيئين اثنين…أما ينوضوا ولاد البلاد يشمروا على دراعهوم عوض ميعريو على ودنيهوم وينوضوا يخدموا بلادهوم بالجد والمثابرة والإخلاص لأنها بلادهوم وعمر البراني متهزو النفس على بلاد ماشي ديالو…وبلا ميعولوا على دوك المنتخبين ديال الكارتون اللي جاو على حساب القصاير والشاليني أبابا وهز ياوز وعين الجمعة عاوزة كدا وقولوا العام زين وزيد التعلاق للشيخات والشطيح معاهوم كاع والترداد مع النشادة وعاد زيدك اللقاءات مع المسؤولين والتبندير والسيارات والتلفونات آخر موديل والسفريات والمواسم والتبوريدة والمكحلة وبوحبة…وأما ينتاظروا شي زيارة ملكية ميمونة ديال جلالة الملك محمد السادس نصره الله و أيده……يدي كاع دوك المسؤولين للحبس ويعاود الضميس من جديد…هذه هي الحقيقة المرة التي لازال البعض يلوك لسانه بها خفية مع نفسه أو مع اقربائه وأصدقائه…وإذا اقتضى الأمر يبوح بها في القهوة المجاورة لمقر سكناه…ويجبد عليها بواح مولاتي قهوة كحلة دايزها الكلام…ولا يكاد ينتهي من هذه الأحلام والطموحات حتى يقول له مول القهوة…سمح لي غادي نسدو…ديك كيتفكر أنه في عين الجمعة …وأن التغيير لا يمكن أن يأتي بالسرد والحكي والقص…بل ياتي بالنضال والتقطاع ديال السباط والغيرة والحركية والدينامية والبطولة والشهامة وعزة النفس والانفة والنخوة …
إخواني الكرام قراء هذه السلسلة المتواضعة…إن التغيير الذي ننشده بعين الجمعة ليس صعب المنال و مستحيلا…بل يقتضي فقط شيئا واحدا هو أن نكون نحن ساكنة المنطقة على قلب رجل واحد… وتكون أنفسنا صافية… ونياتنا صادقة… وأساليبنا في الحياة راقية …وطموحاتنا مشروعة …ونقيم القسط… ونحكم بالعدل… ونربي أنفسنا على القناعة والتقوى والبر والحسنى …ونحب الخير للجميع… ونحاول مساعدة بعضنا البعض… ونكرم جارنا… ونخرج الصدقات… ونصلي في الوقت… ونكرم أهل القرآن …ونعمر المساجد …ونتهلاو فالفقيه…ماشي نشدو فيه ونوليو نحاربوه بالكذب والإشاعات ونبقاو حاضيينو لواه طول فالصلاة …لواه تيكتب للعيالات…وتلقاه بوراس هو كاع متيصلي …ومعارفش حتى فرائض الوضوء…ونحاربوا الحكرة والظلم والفساد والنميمة والغيبة والتشكامت والحضية والتبركيك والنكان على بنات الناس وقلة الحيا والخداع في البيع والشراء والنقص في الميزان والتطفيف فيه…ونساهموا بقسط معين في تطهير منطقتنا من كل ما من شأنه أن يرجعها سنوات ضوئية إلى الوراء…
للأسف هذا ماحصل فعين الجمعة…لا مجلس زين …لا منتخبون يحاولون إعطاء المسؤولية لمن يستحقها…كلشي مخلط مجلط فديك البلاد…الساكنة نهار ومطال تشكي من الفقر والتهميش …وهي لا تحاول أن تغير حتى من نفسها…كيف نريد التغيير والإصلاح وحنا ممستعدينش نتصلحو من الداخل… أو نصلحوا أنفسنا…نهار ومطال وحنا نبكيو من الفساد… لكن راه حنا اللي ساهمنا فيه فالحقيقة…سواء بالصمت أو الخوف أو …أشياء أخرى…
لنكن صرحاء شوية…ماحدنا متصلحناش من الداخل عمر الإصلاح ما يجي… إلا إذا جا الله من جهتنا وخلاص…للحديث بقية تهلاو فراسكوم…مودتي…
التعليقات مغلقة.