الانتفاضة // قاسيمي عبد الرحيم
بعدما أعلن عزيز أخنوش تنحيه عن قيادة سفينة التجمع الوطني للأحرار مباشرة من بعد اجتماع المكتب السياسي اللعبة تبدلات.
ماشي غير استقالة عادية راها بداية معركة خلافة فواحد التوقيت لي ما فيهش الهضرة: انتخابات 2026 والتحضيرات لمونديال 2030 وزيدها ضغط سياسي داخلي وخارجي غير مسبوق.
السؤال لي داير البوز دابا:
شكون غادي يقود حزب الاحرار فمرحلة ما بعد أخنوش؟
الأسماء لي دايرين تراند بقوة:
رقم 1 مولاي حفيظ العلمي
الاسم اللي داير الضجيج أكثر من أي واحد آخر هو راجل أعمال ناجح في التدبير و الصناعة و في الاستثمارات، وعندوا مخططات كبار تبدلات بها خريطة الاقتصاد المغربي.
▪︎ مخطط التسريع الصناعي.
▪︎ جلب شركات عالمية.
▪︎ قبول شعبي نسبي.
▪︎ كاريزما وهدوء.
بزاف ديال المراقبين كيشوفو فيه الخليفة الطبيعي لأخنوش والرجل المناسب لمرحلة مونديال 2030 لي خاصها عقل اقتصادي قبل أي حاجة.
الرقم 2 شكيب بنموسى هو راجل الدولة بامتياز بلا ضجيج وبلا شعبوية و من ابرز المخططات ديالوا.
▪︎ النموذج التنموي الجديد.
▪︎ الداخلية، التعليم، التخطيط.
وفي العلاقات الدولية قوية جدا حسب المحللين.
السؤال الكبير: واش غادي يدخل المعترك الحزبي من بابه الكبير؟ ولا غدي يبقى رجل المخططات من الخلف؟
الرقم 3 راشيد الطالبي العلمي المعروف برجل التنظيم و هو رئيس مجلس النواب الحالي و معروف عليه بالحافظ لمفاتيح الحزب و كيمثل الاستمرارية التنظيمية و متخصص فالتوافقات الداخلية بلا صداع.
الرقم 4 محمد أوجار رجل حقوقي و دبلوماسي و مفكر سياسي ديال التجمع و مرشح لإعطاء الحزب نفس حقوقي وديمقراطي ولكن واش القواعد باغية هذا الاتجاه دابا ؟ و فوقاش كان مول شكارة كيهتم بحقوق الإنسان؟
و أخيرا مصطفى بايتاس العلبة السوداء للحزب و ناطق رسمي باسم حكومة عزيز اخنوش و من المقربين ليه بقوة.
هو مرشح الاستمرارية الهادئة وضبط الماكينة ولكن واش عندو الكاريزما الكافية لقيادة المرحلة ؟ الاغلبية الساحقة تقول ..لا
الخلاصة اللي استنتجتها بلا لف و لا دوران و إلى بغينا نهدرو بالمنطق السياسي والواقعي:
المرشح الأقوى دابا هو مولاي حفيظ العلمي…علاش ؟
حيت كيجمع بين المال و الكاريزما و التجربة و العلاقات والقابلية لتسويق الحزب داخليا وخارجيا خصوصا فمرحلة حساسة بحال 2026 و2030.
لكن…! السياسة ما فيهاش اليقين والكلمة الأخيرة غادي تكون للمؤتمر وللتوازنات وللصفقات لي كتدار فالكواليس.
حزب رمز الحمامة دابا واقف فمفترق طرق… يا إما قيادة قوية كتقود السفينة وسط العواصف وإما صراعات داخلية كتضيع البوصلة.
الأيام الجاية غدي تكون عامرة بالمفاجآت…و لكن كيبقى لي عندوا السيڤي تقيل هو لي غدي يكون بيلوط فالمرحلة القادمة على رأس حزب التجمع الوطني للأحرار.
التعليقات مغلقة.