الانتفاضة…محمد المتوكل
الرجولة عمل بطولي لا يُصنع في النوادي الرياضية… ولا يقاس بأرقام كشوف الحسابات البنكية المضروبة حتى للزنافر…الرجولة لن تصل إليها بالصوت العالي …والزكا والزعيق والنعيق…والغوات والهيلالة وجيلالة وحمادشة…وسيدي حماد وموس…وهالجاوي هاحصالابان… واللي فيه الحال يبان…الرجولة ليست خرشاشة شاريها بالزز…وهازا ليك رجليك…وكل مرة طايحة ليك اومبان…الرجولة ليست بوسط فواحد الخدمة تمتص بها عرق الاخرين بدون سابق انذار…وستحاسب عليه امام الواحد القهار…الرجولة… ليست حجة فالمقام الشريف وانت لا تكاد تعرف فرائض الوضوء… وربما لا تعرف حتى القبلة فين جات…وربما تصلي بطلع البدر علينا عوض فاتحة الكتاب…الرجولة… ماشي تدير مشقوف ديال الخردة بالبصمات… وعاطيه ليه غير راجل ختك وتضل تتغوت بيه على الناس بلا سبب…الرجولة …ماشي تضل تبركك على الناس فالصباح وفالعشية…وتحسب للناس الصيكان نهار الاحد…الرجولة… ماشي هي تشري طريطيرة قديمة ماعندهاش حتى السيلاندر صحيح…وتبغي تطير بيها… الرجولة …لن تنالها بالاستعلاء على البشر…والتنوفيخ الخاوي…وتخراج البادر…الرجولة… ليست زرا تضغط عليه… أو ميزة تقتنيها …فأرح نفسك من عناء إثبات رجولتك… الكاذبة…الرجولة…هي تنوض للفجر…فوقت البرد…الرجولة…هي تسول على تافقيرت ديال مك واش فطرات ولامزال…الرجولة…هي تهز الكوكوط وتقول للمدام اليوم نتغداو عند الوالدة…ونعرفك راجل ابوالركابي ديرها الى ماتقلب عليك المدام الكوكوط بخيزو واللفت ديالها…الرجولة…هي تهلا فبيت الله وماتجيش بتقاشرك خانزين وتقلب لينا الجامع …وملي تخرج تشد فالفقيه…بالنميمة والكلام ديال الشوافات…الرجولة…هي ملي تدوز حدا الكرادة تجيك النفس عليها وتجمع ولاد المنطقة وتقول ليهوم يالله نقيو السقاية من الزبل راه هي اللي مهليا فينا سنوات عديدة…الرجولة…هي ملي تشوف وليدات شعبانات تيلعبو الكورة فالحفرة ديال الكرادة ماشي تجري عليهوم…جبد الكيدار واحد ماية درهم وقول ليهوم هاكو باش تشريو الكورة…الرجولة…هي تجيك النفس على الوليدات اللي تيجيو يقراو فالمدرسة على الحمير الله يخركهوم ليك… زعما النقل المدرسي عوض ربعة ديال البنوات…نبدلوه بجوج ودنين طوال…الرجولة…هي ملي يوقف عليك بنادم تكون فجنبو…ماشي تقلقل عليه بالصواب والبلابلا…وملي يحتاجك تبقا تقاقي كي الدجاجة…الرجولة…ماشي تدير المدام فجنبك وترمي المشقوفة ديال مك اللور…وتجي تعاود لي على بر الوالدين…سير بخر بيها…الرجولة… ماشي تشوف بنات شعبانات جايات يصبنو ولا يعمرو الما…عاد تيجيك نت اللغيط والحتيت والهضاضر…نلقاك تما نحيد ليك رجليك بشي زبارة…الكيدار…الرجولة…هي تديها فسوق راسك…وتهلا فولادك ووالديك عوض ما تقطع معاها التواصل وتعزل بوحدك وتجغدد نت والمدام والدرتري ومك مسكينة شادة الركنة…الرجولة هي عوض ما يشيب راسك فالتاحرتميات والتقوليب والتاحديدانيت والتبركيك والتقلقيل والتوصال ديال الهضرة والغمز واللمز والتجسس والتبلحيس والتقردين والتبنديق والتزنديق والتحسريف والتنوعير والتنوغيش والحكرة والسب والشتم والقذف والتجسس والنميمة والغيبة تدير الخير فراسك وتنقي راسك وتبدل السليب الثقوب والخانز اللي تضل لابسو الشهر والشهرين …راه ماجاتش بالنضاضر والفيستة ونت مايجيك حتى درهم…تتمشي توها القهاوي فعين الجمعة وتدير فوكونطات باش تجي تعلير سيادك المجحوم…الرجولة ماشي تخلي جوج زغبات فوجهك وتحسن فحال البوبيات وتبغي تدير فيها راحل ونت غير شماتة…وسنين والدوار عارفك حمق مزنزن…الرجولة ماشي تجيب واحد من عين الجمعة يترشح بسميت شعبانات وهو عمروحط قاعو تما علاش لانه جايبو واحد البركاك حيث عطاه القفة ديال كورونا اللي فرقها بالليل باش ما يعيق بيه حتى واحد…وساهم معاهوم فالخزانة بواحد ٣٠٠٠ درهم…الرجولة ماشي تجي تتشكي من مدير الفيرمة النايحة وتبغي تدير النقابة باش تدافع على حقوقك المهضومة…وملي تعيق بيك الفيرمة النايحة وتعرف الشغل حماض تاخذك مباشرة وتعينك محاسب باش تقطع الراس للنقابة ونت فرحان وضربتها بنكرة لصحابك اللي كانو معاك…الرجولة ماشي نتقاتل انا عبد ربه طيلة سنتين باش نصايب ليكوم جمعية دايزها الكلام وخسرت عليها زباله ديال الفلوس وملي نجي نتحاسب معاكوم المجاحيم القرودة تضربها لي بنكرة…الرجولة ماشي تبقا مجبد فالصوابر فحال السلوكي حاضي الغادي والجاي وكالس على التبركبك والتجسس والتبلحيس والهضاضر والقرنابي…الرجولة ماشي تخلي جوج زميلات فوجهك وتدير فيها ولي من أولياء الله …ونت شيطان مارد…الرجولة ماشي تكون داير فيها مثقف وقاري وتتعرف فكورونا والاحباب السياسية والاقتصاد والريع والكورة والانتخابات …ونت مدير الفيرمة النايحة الى شفتيه تتشدك السريسيرة…الرجولة ماشي تدير الرخام والزليج لقبر باك اللي مشا عند سيدي ربي …بالمقابل خاصك تدير الرخام والزليج لاعمالك نت اللي حتى الصلاة متتصليش…بنادم قاطع علاقتو مع الله فبالاحرى مع الاهل والاحباب…الرجولة ماشي تتقرب الانتخابات وعاد تيجيو كمامر النحس و الدلاقشية يبداو فالزابور والقرنابي وهوما طيلة مدة انتدابهوم مادارو حتى وزة فقط بدلو الكومبلي وشراو تلفون جديد… دابا راهوم تيديرو التوفة فالشانطي بلا حمير بلا عبو الريح…الرجولة ماشي تبقا مقابل محمد المتوكل راه سافر راه مشا راه جا راه تزوج راه طلق راه طلع لشعبانات راه مشا لمكناس راه دار قهوة فسيدي سليمان راه مشا لافريقيا راه مشا لعين الجمعة راه باغي يترشح راه تزاد عندو وليد راه تيكتب فالفيسبوك… راه مشا عند الجوندارم مقابل شهادة ادارية راه راه راه…محمد المتوكل طالب مجاز وفاعل جمعوي اشتغلت في عدد من الجمعيات الخيرية والاغاثية في المغرب وغينيا كوناكري ومراسل صحفي واطار تربوي ومناضل سياسي…بلا فخمة على الله وبكل تواضع وتجرد…الناس تتعرفني والحمد لله وسيرتي لست مؤهلا للحديث عنها لان الناس تعرفها…درويش وداخل سوق راسي لكن اللي حك علي نوريه النجوم فعز الظهر…معنديش مع المنافقين…والدجالة والحضاية والبلابلية…الرجولة ماشي تبقا حياتك كلها ونت تتصنع فالكذوب تقول عندك وزين…ونت عارف باللي النص الكبير فحياتك مشا غير ترهبين وداير راسك فاهم كلشي…الرجولة دير الخير فراسك…وتربي ولادك…وتهلا فبيت الله…واحسن للجيران والحومة والدوار…وكن نموذج فالاخلاق والتربية وتهلا فالمساكين…والمحتاجين…وخلينا نشوفوك راجل ولو مرة وحدة فحياتك…وبلا متفوح عليا لواه انا قاري لونكلي ولفرونسي وماعرفت شنو …وملي نت قاري هاد الشي كلو علاه مزال ساكن مور الفولون….الرجولة الخاوا…خُلق لا يصله إلا القليل…
تلقاه معري على ودنيه وسروالو مشرك واخلاقو مكرفصة ويجي يقول ليك شنو عطاني الدوار…احمد الله القرد…الدوار على الاقل حاسبك ذكر…ماحاسبكش ذاعرة في المواخير الليلية… تحية للجميع…..
التعليقات مغلقة.