الانتفاضة/ محمد المتوكل
مؤسسة بقي منها غير الجدران بعد ما خربوها وسرقو اثاثها…بنادم دا البلانش البيبان الشراجم الحجر الزمر الزفت القطران البلدي…الله يعفو علينا…راه تما تيقراو الوليدات ابوقاااااااااااااال…وزيد عاد الدولة مهمشاها…المهم من الصور تيبان ليك باللي حنا تقريبا فالعصر الحجري…وما قبل التاريخ والجغرافيا وحتى التربية الوطنية…أنا شخصيا قريت هنا وأكثر خمسة اشهر…فاكاطير…اش غانقول ليكوم الكارثة وقات الليل…الوليدات ماي تتجي الشتا والبرد تيوليو حالتهوم حالة…أما أنا فاقع تقريبا عشرين كيلو الي وعشرين روتور…ماتوصل لديك المؤسسسسسسسسسة غير بشق الأنفس…وتتلقا الطبالي مهرسين الشراجم مهرسين…البيبان مهرسين…الطباشير والو…السبورة والو…الضو والو…الماء والو…الطواليطات والو…وابنادم هز حتى داك لوبون ديال المرحاض وداه لدارو…زعما طفرتيه الله يعطيك الدل…المدلووووووووول…دابا الوزارة الوصية سداتها لاسباب سلاماتية…والوليدات اللي كانوا تيقراو فديك الخربة نقلوهوم لشعبانات…وبقيت ديك الحيوط كأنها الاطلال…خاص غير مي كلثوم تنوض من القبر وتجي تغني عليها شي قطعة اخرى مشابهة لتلك الاطلال…
عموما واحد المرة زارني المفتش فديك المدرسة وجا شاف ذاك المنظر…ومعحبوش الحال…سولني وقال لي شنو تدير نتا هنا…قلت ليه تنبيع الحمص…كنكيل الفول…مقصر فجامع الفنا جالس فأوبيرا فحمرية…هههه….اش تندير انا هنا…راني تنقري السي المفتش…وعرف باللي انا متعاقد في إطار تعويض الخصاص…وقال لي نت بوحدك…قلت ليه ايييييييه نعام السي…وقال فين المعلمين الآخرين…قلت ليه مااااااانعرف…نسولك نت…المهم شافني حمرت فيه وهو يركب فخرشاشتو وزاد مع الطريق…وهو يتمتم بكلمات فهمت من خلالها…ان يقول في قرارة نفسه…منين خرج لي هاد خينا…يالله تدوزون بخير…
