اش خاصك أعين الجمعة…سيدي الشباني امولاي…

الانتفاضة

الناس تتموت بالعطش…وقلة الموارد المائية…وانعدام المسالك والطرق والممرات والولوجيات وانعدام أسس التنمية المستدامة وانقطاع الكهرباء كل وقت وحين والسوق المرون والمقبرة التي لا سياج لها والملعب المملوء بالربيع والأعشاب الضارة…والبطالة المضروبة في الشباب حتى لزداك اداك…والفقر المذقع الذي تعيش عليه الساكنة والسببطار اللي مافيهش حتى الدوا الاحمر والفرماسيان اللي متيديرش المداومة الليلية والبوسطة اللي مافيهاش الكيشي الاوطوماتيكي والمازوط الغالي وليصانص الغالي والمقاهي اللي مافيهاش أدنى شروط النظافة وغياب السناكات التي تقدم أجمل الأكلات وغياب المحطة الطرقية بمواصفات جيدة والكوليج اللي مازال البعالك تينقزو ليه من السور ودار الطالبة التي تحتاج للدعم والتاطير ودار الشباب المكتوبة بأسماء البعض دون الاخر…إضافة إلى انعدام نوادي للترفيه والمساحات الخضراء…شي وحدين باعو كاع الشجر ديال المنطقة…أما الواد الحار فاسأل سكان عين الجمعة وستجد عندهم الخبر اليقين…بلا مانهضر على معاناة الخطافة والدجايجية والحلاقة والبقالة والخضارة وصحاب الزريعة والكورتية وكل من يمتهن حرفة صغيرة من اجل la nourriture ديال فاميلتو وطاسيلتو…عين الجمعة تحتاج للمعامل ولوزينات والخدمة والرواج…وخاص مجلس حموشان وحوارييه يشوفو لاحتياجات الساكنة ومعاناتهم اليومية…خاصهوم تكون عندهوم رؤية استباقية لمعالجة عدد من الاشكالات التي تؤرق الساكنة من قبيل ما سبق ذكره…وخاص المجلس المنتخب ينزل برنامج العمل الذي أشرت عليه العمالة ويبدأ التنزيل ديالو على أرض الواقع…ماشي يجي المجلس وبعض الاحيان يجتامعو…قلت مع راسي علامن غايجتامعو…قالك سيدي الشباني…بيييييييييييييك اوليدي…سيدي الشباني…هو اللي خاصنا…نتوما نوضو تكعدو باراكا من القوالب وشوفو الوضعية ديال عين الجمعة…الحبشي راه شبعان مواسم وفيجطات وشيخات وشلا ديال قلة مايدار…ونفتارضو انكم نضمتوا هاد الموسم مثلا…شنو العائد ديال المنطقة من هاد الموسم…غير الغبابر والعجاج وشوية ديال الخيل والضاضوس…وملي تيسالي تتبقا الازبال والجورنالات والخرووووووج ديال عباد الله والميكات تاتسوا بطاطا برطل…عاد زيد داك الموسم تيتقام حدا المقبرة والمفروض أن الحبشي يوقر ديك المقبرة ويحتارمها…وبنادم للأسف الشديد ماتايعجبو يزها غير حدا الأموات…دون ان ننسى أن هاد الموسم ديال سيدي الشباني تيتقام بالتزامن مع الموسم الدراسي اللي مفروض الولاد والوليدات يمشيو يقراو ماشي يمشيو يلعبو الضاضوس…والى هاد الاعيان عندهوم الفلوس وكايبانو غير مثل هاد المناسبات فحال الحلزوووووووووووونة….وعندهوم النفس على جماعة عين الجمعة…اسيدي كاين بزااااااااف مايدار فديك الجماعة لفائدة الفقراء والمساكين والمحتاجين…يقلبو على الفقراء يشريو للوليدات الكتوبة ديال الدخول المدرسي…يشريو للفقراء الكسوة ديال الدخول المدرسي…يمشيو للحوانت يخلصو على البوفرية الكريدي…يشريو للمرضى الدوا…وكاين اللي واقف على العمليات وماعندو حتى فرنك ويلتجئ للفيسبوك يبكي ويشكي على الله يلقا شي محسن…هادي هي الخدمة النقية مع الله بعدا ومع العبد…ماشي يمولو المواسم والمهرجانات وأراك للشطيح والرديح وعاود دردك زيد دردك…والشيخات والبنات والطاسة والقرطاسة مع ما يواكب ذلك من مخالفات شرعية خايبة حتى للمعاودة سواء مع رب العباد او مع العباد أنفسهم…
باركا اذن من الطنز الخاوي…والفوحان الخاوي…والبخخخخخخ الخاوي…راه عين الجمعة خاصها الإصلاح ماشي الافساد…حنا ماشي ضد المواسم والترفيه المنضبط والملتزم والمسؤول…لكن ماشي وقتو…فهمتوني ااااااااارباعة الاعيييييييان العيااااااااانين…والسلااااااااااام
المتوكل محمد

Share

عن جريدة الانتفاضة

بين صفحاتها للكل نصيب ترى أن التحاور مع الآخر ضرورة وسيجد هذا الآخر كل الآذان الصاغية والقلوب المفتوحة سواء التقينا معه فكريا أو افترقنا ما دمنا نمتلك خطابا مشتركا.

تحقق أيضا

كوفيد-19: 9 إصابات جديدة وأزيد من 6 ملايين و876 ألف شخص تلقوا الجرعة 3 من اللقاح

الانتفاضة أعلنت وزارة الصحة والحماية الاجتماعية، اليوم السبت، عن تسجيل 9 إصابات جديدة بـ(كوفيد-19)، وذلك …